Skriva út

Brúðarvígsla



Tá ið eitt par, genta og drongur, vilja ganga saman í hjúnalag, venda tey sær til prestin, ið hevur ábyrgd av vígslukirkjuni, at verða innskrivað og skrivað undir skjalið ”Hjúnalagsváttan”.

Býr brúðarparið í Danmark og vil vígast í Føroyum, mega tey hava ”Prøvelsesattest” við. Hon fæst á kommunuskrivstovuni í tí kommunu, har brúðarparið býr. Nøkulunda sama mannagongd er galdandi, um bústaðurin er í øðrum Norðurlandi.

Tær luthersku kirkjurnar í Norðanlondum samstarva sínámillum. Pør úr Finnlandi, Svøríki, Noregi, Danmark, Grønlandi og Íslandi kunnu verða vígd í fólkakirkjuni.

Pør úr øðrum londum kunnu verða vígd í føroysku fólkakirkjuni treytað av, at annar parturin upprunaliga kemur úr Føroyum ella hevur / hevur havt uppruna her.

Kirkjulig vígsla er treytað av, at annar parturin er limur í Fólkakirkjuni.

Eru báðir partar, drongur og genta, limir í fólkakirkjuni, hevur parið rætt til at verða vígt í fólkakirkjuni.

Er einans annar parturin limur í fólkakirkjuni, kann parið verða vígt í fólkakirkjuni. Hin einstaki presturin tekur sína egnu avgerð.

Er talan um fráskild fólk, má skilnaðarbræv verða latið prestinum og viðurskiftini í fyrra hjúnalagnum vera uppgjørd ella ávegis uppgjørd.

Fráskild fólk hava eyðvitað rætt til at verða vígd í fólkakirkjuni. Hin einstaki presturin hevur rætt til at bera seg undan at víga fráskild. Tó, fólkakirkjan hevur tryggjað sær, at øll, ið hava rætt til vígslu, verða vígd.

Áðrenn brúðarvíglsuna hevur brúðarparið samtalu við prestin, ið víga skal, og samstundis gevur hann teimum vegleiðing um, hvussu brúðarvígslan fer fram.

Brúðarparið finnur tvey vitni til brúðarvígsluna. Eitt vitni til brúðrina og eitt til brúðgómin.

Brúðarvígsla kann eisini fara fram í samkomuhúsi hjá kristnum samkomum, sum hava vígslumyndugleika.

Somuleiðis kann eitt par í staðin giftast borgarliga, og venda tey sær tá til hin borgarliga myndugleikan, ið hevur giftimyndugleika.

Kirkjulig brúðarvígsla fer vanliga fram í kirkjuni; tó kann vígslan eisini fara fram í prestagarði ella heima. Undir serligum umstøðum, t.d. vegna sjúku, kann vígslan fara fram á sjúkrahúsi ella øðrum stovni.

Vígslumyndugleikin boðar Fólkayvirlitinum og Navnanevndini frá brúðarvígsluni.

Løgfrøðiliga eru kirkjulig brúðarvígsla, brúðarvígsla við samkomuleiðara og borgarlig gifting javnsett. Men í kirkju og samkomu verður eins stórur dentur lagdur á heilagleikan í hjúnalagnum, Guds fyriskipan og signing.

Støðið undir kristna hjúnalagnum er at finna í Guds skapanarskipan.

”Og Gud skapaði menniskja eftir síni mynd, í Guds mynd skapaði hann tað, sum mann og konu skapaði hann tey, og Gud vælsignaði tey.” 1. Mós. 1,26-28a.

”Og Jesus sigur um heilagskap og friðhalgi hjúnalagsins: ”Hava tit ikki lisið, at Skaparin frá upphavi skapaði tey mann og konu og segði: ”Tí skal maður fara frá faðir sínum og móður síni og halda seg til konu sína, og tey tvey skulu verða eitt hold?” So eru tey ikki longur tvey, men eitt hold. Tað, sum Gud tí hevur saman komið, má maður ikki sundur skilja.” Matt. 19,4-6.

Set teg í samband við prest
Vís meira