Prestahjúnini í Hvalvík

Fjórða sunnudag eftir trettanda, 30. januar 2011, fáa norðstreymoyingar nýggjan sóknarprest. Tað er 32 ára gamli vágbingurin, Bergtórur Hjelm Bjarkhamar, ið er kallaður til embætið sum sóknarprestur við sæti í Hvalvík.

Bergtórur las gudfrøði á Lærda Háskúlanum í Keypmannahavn og tók embætisprógv seinasta summar. Til tess at gerast prestur mega kandidatarnir ganga eitt hálvt ár á einum serligum prestaskúla. Hesin skúlin kallast Pastoralseminariið, og henda partin av lestrinum tók hann í Århus.

Í lestrartíðini í Keypmannahavn røkti Bergtórur tænastu sum kirkjutænari við Mariukirkjuna á Vesturbrúgv og við Samuelskirkjuna, har føroyingar koma saman til gudstænastu. Kunnleikin til yrki hjá einum kirkjutænara er góður førningur at hava við sær inn í gerningin sum prestur.

Bergtórur hevur eisini havt sæti sum kirkjuráðslimur í tveimum kirkjuráðnum. T.d. var hann eitt skifti formaður fyri føroyska kirkjuliðnum við Samuelskirkjuna.

Bergtóri dámar væl at syngja, og hevur hann sungið í fleiri kórum, m.a. Húsakórinum, ið heldur til í Føroyahúsinum í Keypmannahavn.

Tað er ein ung familja, ið flytur til Hvalvíkar, og hugaligt er, at prestagarðurin er dagførdur og í góðum standi. Prestafrúan, Haldis Muller, er ættað úr Hvalba. Hon er námsfrøðingur og starvast dagliga á Dagstovninum á Argjum. Dóttir teirra, Femja, er tvey ára gomul.

Vit ynskja teimum góðan trivnað og Harrans signing í tænastuni.

Orð: JF.
Mynd: ANH