Prestahjúnini í Fuglafirði

Seinasta sunnudag varð Anne Mette Greve Klemensen prestvígd í Dómkirkjuni. Komandi sunnudagin, 3. s. e. trettanda, verður hon innsett í kallið sum sóknarprestur í Fuglafjarðar prestagjaldi. Tað verður undangongumaður hennara í kallinum, dómprósturin, Uni Næs, ið skipar nýggja prestin embætið.

Anne Mette er dani. Hon læs gudfrøði á Lærda Háskúlanum í Keypmannahavn og tók prógv á sumri í 2010. Í adventini fullførdi hon Pastoralseminariið, so sigast kann, at leiðin inn í embætið hevur gingið væl.

Anne Mette kennir væl føroysk viðurskifti. Sum ung genta var hon á Háskúlanum í Tórshavn. Har lærdi hon føroyskt mál og mentan, og hetta kemur væl við, nú hon skal taka við kallinum sum prestur í fólkakirkjuni.

Anne Mette hevur eisini sungið í føroyska útisetakórinum MPIRI og á henda hátt lært ein týðandi tátt av føroyskari mentan við atliti at sálmum og sangi. Hon hevur føroyskan mann, Leif Hansen, ið er ættaður úr Nólsoy. Leif er kendur urguleikari í høvuðsstaðnum, har hann mangan hevur verið feriuavloysari. Í Keypmannahavn var hann urguleikari við Samuelskirkjuna, har føroyingar savnast til gudstænasta, sankta Ólavs Kirkjulið.

Saman við børnunum - Beinta fødd í 2004 og Helgi føddur í 2006 - koma tey at búgva í prestagarðinum, á Mørkini 10, í Fuglafirði.

Anne Mette skilir væl føroyska málið í talu og skrift. Vit ynskja teimum góðan trivnað og Harrans signing í tænastuni.

JF