Hátíðarhald í Haldórsvík í sambandi við at kirkjan verður 150 ár.

Sunnudagin komandi verður hátíðarhald í Haldórsvík, í sambandi við at kirkjan verður 150 ár. Hátíðarhaldið byrjar kl. 11.00 við gudstænastu í kirkjuni við Hans J. Joensen, bispi og Bjarna Bæk, dómprósti. Eftir Guðstænastuna verður døgurði fyri innbodnum í Avhaldshúsinum. Kl. 16.00  verður skipað fyri songløtu við Kingobólkinum úr Tjørnuvík og sóknarprestunum Marjun Bæk og Ingu Poulsen Dam. Aftaná bjóðar kirkjuráðið til samkomu í Avhaldshúsinum, har borðreitt verður við kaffi og køkum har øll eru vælkomin.

Carl Vilhelm Prytz, sum var sóknarprestur í Norðstreymi, var íðin slóðari og undangongumaður at fáa kirkju til Haldórsvíkar. So íðin, at longu í 1854 sigur hann, at hann hevur sjálvur gjørt tekning til kirkjuna, og, sum hann sjálvur tekur til: Efter en hidtil på Færøerne ukendt plan. Sum fyrimynd hevur hann til tekningina nýtt kirkjuna á Frederiksberg, ein áttahyrnt barokkirkja.

Prytz mælir amtmanninum Dahlerup til at lata Per í Nesinum (sum eisini hevur hjálpt honum við tekningini) - Peter Frederik Jacobsen úr Vestmanna - byggja kirkjuna.

Per í Nesinum gevur boð og fær arbeiðið. Kostnaðarætlanin er dagfest 30. mars 1854. Men lágt hevur hann boðið, undirskot bleiv hjá honum, og tí fekk kirkjan ongantíð ta hædd, henni av fyrstan tíð var ætlað.

1. oktober 1855 tók V.U. Hammershaimb við embætinum í Norðstreymi, og av tí at Norðstreym hevði ligið í prestaloysi ein part av árinum, var arbeiðið uppá kirkjuna ikki komi í gongd. Tá amtmaðurin skundar undir, í brævi frá 27. desember 1855, fór Per í Nesinum í holt við byggingina.

Kirkjan varð vígd annan sunnudag í advent 1856 av Hammershaimb presti, og tá vóru eisini prósturin Andreas Djurhuus og fimm aðrir prestar staddir har.

Í 1932 varð kirkjan meira ella minni bygd umaftur. M.a. vórðu veggirnir hækkaðir, soleiðis sum uppruna tekningin vísti og forkirkja varð bygd uppí vestureftir.

Kirkjan varð nú aftur vígd annan sunnudag í advent 1932, av Jákup Dahl prósti, og K. Grøn sóknarprestur prædikaði.