Góð móttøka í Hvalvík

Sunnudagin varð Bergtórur Hjelm Bjarkhamar innsettur í embætið í Norðstreymoyar prestagjaldi.

Bergtórur Hjelm Bjarkhamar varð prestvígdur av Jógvani Fríðríksson, biskupi,í dómkirkjuni 16. januar. Við hátíðarløtu í Hvalvíkar kirkju, skipaði dómprósturin nýggja sóknarprestin í embætið, og Bergtórur prædikaði yvir dagsins tekst.

Hvalvíkar kirkja var fullsett, og 12 prestar vóru komnir at heilsa uppá og stuðla nýggja sóknarprestinum á fyrsta arbeiðsdegi hansara.

Fólk úr Musikkskúlanum og Kingo-kórið í Tjørnuvík settu sín serliga dám á løtuna í kirkjuni við tónleiki og sangi.

Eftir gudstænastuna var kirkju- og bygdafólkið boðið í missiónshúsið til ein drekkamunn, har fleiri talur vórðu hildnir fyri nýggju prestafólkunum. Um kvøldið var opið hús í prestagarðinum.

Hjartaliga tillukku við embætinum við ynskjum um Guds signing yvir gerningin í Norðstreymoyar prestagjaldi.

Orð: UN
Mynd: JKV