Skriva út

Hans Jacob Niclasen

Hans Jacob Niclasen
klokkari deknur forsangari
Hestur
Eftir Jústinus Leivsson Eidesgaard

At stava frá eini doyggjandi bygd er altíð hugstoytt. Tað var ikki av góðum huga, at Hans Jacob Niclasen úr Hesti flutti til Havnar í 1998. Tá var hann 41 ára gamal, ein maður í bestu árum. Hans Jacob fór til Havnar at skera stál á Tórshavnar Skipasmiðju og tað ger hann enn.

Hann tekst eisini við annað fyrifallandi arbeiði á Skipasmiðjuni, sum nú kallast MEST og hann letir væl at arbeiðsplássinum. Hann flutti frá einum starvi í Hesti sum keypmaður og fiskakeypari, eitt starv, sum hevði verið í familjuni leingi. Hann fekk óunniliga leiklutin at seta lykilin í hurðina og stongja fyri hesum virksemi. Hans Jákup er føddur 28 juni 1957.

-Tann stutta søgan er skjótt søgd. Eg fekkst við handil og fisk og grundarlagið fór undan. Fólkið flytur og ring fiskiár í nítiárunum í farnu øld. Og í eini tómari bygd eru heldur ongin kundar til handilin og tað gav seg sjálvt.

-Ein partur av mær er framvegis í Hesti og eg eri nógv har úti. Eg varð pressaður til at flyta, eg varð noyddur og tað svíður. Og eri eg í Hesti, tá eri eg eisini kirkjutænari.

-Eg kom rættuliga ungur upp í kirkjuarbeiði. Varð valdur í kirkjuráðið longu sum 17 ára gamal. Eg var for ungur, og tað var vistnokk ikki heilt lógligt. Eg hevði øll størv í kirkjuni, klokkari, deknur og forsagnari, tá ið ongin var at spæla urgu. Tá íð Árni Nybo gavst, fór eg at lesa fast eitt tíðarskeið. Og tá íð eg fór at vera meira í Havn, tók Ebbe Rasmussen yvir.

Hans Jacob er giftur við Erlu Matras Jensen. Tey eiga fýra gentir og enn eru ongi barnabørn komin.